Ánægð með minn mann.

Gaman var að fylgjast með Jóni og Ingibjörgu í kastljósi fyrr í kvöld þegar þau ræddu auðlindafrumvarpið og fleiri mál.

 

Jón talaði um málið af yfirvegun og þekkingu og lét ekki hæðnisleg ummæli Ingibjargar slá sig út af laginu. Hann hefur sannfæringu fyrir málinu og það skín langar leiðir.

 

Ég tel mig yfirleitt hafa getað horft á forystumenn annara flokka án þess að líta á þá sem andstæðinga. Hef reyndar oftar en ekki dáðst að þeim í laumi. Mér hefur fundist sumir þeirra afburða mælskir, fluggáfaðir og með ótrúlega útgeislun. Ég hef líka leyft mér að gagnrýna mína forystumenn.

 

En í dag fannst mér Ingibjörg, sem oft hefur sýnt góða takta, missa flugið. Svo virðist vera sem að slæm staða flokksins í skoðanakönnunum hafi valdið því að hún hefur misst sjálfstraustið. Þá tilfinningu þekkja margir framsóknarmenn.

 

Að sama skapi fannst mér foringi VG fara ansi bratt í þinginu í dag. Ég hafði það sterklega á tilfinningunni að hann héldi að líf og tilvera okkar framsóknarmanna snérist um hann og hans ásjónu. Steingrímur hélt því fram að við framsóknarmenn ættum enga heitari ósk en að hann væri ekki til. Að tilvist hans og tilvera valdi okkur framsóknarmönnum miklu hugarangri. Hvað í ósköpunum heldur maðurinn að hann sé? Eru stórmennskudraumarnir ekki farnir að verða full miklir?

Athugasemdir

[Þórdís Bára Hannesdóttir, 13.3.2007 kl. 21:46]

,,Hver lítur sínum augum á silfrið"  Ég var einmitt að dáðst að því hvað Jón var kurteis og málefnalegur sem og Ingibjörg og að Jón hafði nógu mikið sjálfstraust til að þurfa ekki eins og nær allir andstæðingar Ingibjargar að vera með ódrengilegan áróður og óhróður á móti henni.  Mér finnst það rannsóknarefni þetta hatur sem andstæðingar Ingibjargar í pólítik hafa út í hana.  Því heiðarlegri og duglegri stjórnmálamaður er varla til.  Er ekki komið nóg?  P.s. ég er ekki að segja að þú sért í þeim flokki.

[Guðmundur Jónas Kristjánsson, 14.3.2007 kl. 00:43]

Jón var mjög málefnalegur og kom mjög sterkur frá þessu Kastljósþætti.Þarf að koma miklu meira fram í dagsljósið nú í kjölfar kosningana, þannig að þjóðin og kjósendur fái að kynnast hans sterku persónu mun betur. Því miður  var Ingibjörg engan vegin að höfða til þjóðarinnar í kvöld enda hennar meiriháttar fylgishrun samkvæmt því!

[Helga Sigrún Harðardóttir, 15.3.2007 kl. 20:55]

Þetta meinta hatur, sem sennilega má líka túlka sem andúð er tilkomið vegna þess að formaður Samfylkingarinnar er orðljót og árásargjörn. Það hefur ekki fleytt mönnum langt. Né konum. Eins og skoðanakannanir gefa til kynna þessa dagana.

[Sigurður Þórðarson, 16.3.2007 kl. 12:08]