Fréttir af miðstjórnarfundi

Flaug norður á Akureyri á miðstjórnarfund a föstudagskvöld. Þótt fundurinn hæfist ekki fyrr en á laugardag er það nú einu sinni þannig að raunverulegu stöðuna finnur maður á fólkinu fyrir fund. Þegar menn ræða málin maður á mann og allt er látið flakka. Var margs vísari eftir þá umræðu.

Á laugardag var síðan fundur miðstjórnar. Verð að viðurkenna að mér líkaði ekki allt það sem þar var sagt. Veit stundum ekki hvort leiktjöldin fá meiri umfjöllun í fjölmiðlum en raunveruleg staða þeirra mála sem rædd eru á slíkum fundum.

Að minnsta kosti er ég verulega hugsi eftir fundinn. Hver við stefnum og hvað sé í spilunum. Ekki síst hverjir það séu sem móti stefnu flokksins.

Æðsta stofnun flokksins, flokksþingið, mótaði grunnstefnu flokksins í sérstöku plaggi árið 2001. Síðan mótaði síðasta flokksþing á liðnu vori , líkt og öll flokksþing gera, stefnu sína í helstu málaflokkum.

Ég hef alltaf talið að í stefnumótun flokks, líkt og í stefnumótun fyrirtækja, að það best sé að margir komi að slíkri vinnu en ekki að einstakir aðilar leggi hver fram sína stefnu. Slíkt boðar aldrei sátt um sameiginlega sýn og hvað þá síður sýnir það fram á lýðræðisleg vinnubrögð.

Það yrði nokkuð torsótt ef allir forystumenn flokksins leggðu hver fyrir sig fram slíka framtíðarsýn. Myndi aðeins sýna fram á ólíka skoðanir flokksmanna og ýta undir átök.

Fundir

Þrír fundir hjá mér um ólík efni í gær.

Fyrst var fundur í félagsmálaráðuneyti þar sem fjallað er um lengdra viðveru fatlaðra ungmenna í framhaldsskólum. Gott mál sem þarf var að ræða. Veit af reynslu að foreldrar fatlaðra barna standa frammi fyrir öðrum veruleika en flestir aðrir foreldrar. Börnin þeirra verða ekki sjálfbjarga í daglegu lífi fyrr en mun seinna en önnur börn og sum ná þeirri færni aldrei í lífinu. Það er því mikilvægt að foreldrum þessara barna verði gert það kleyft að vera úti á vinnumarkaði. Það er því miður ekki alltaf raunin.

Síðan tók við fundur í Áfengis-og vímuvarnaráði. Hef setið í ráðinu í nokkur ár og geri ráð fyrir að nú verði nýtt ráð skipað í byrjun árs. Hitti þar Sigrúnu Aðalbjarnardóttur sem situr með mér í ráðinu. Hún er að gefa út áhugaverða bók sem ber nafnið "virðing og umhyggja-ákall 21 aldar" og er þörf ábending til aldrei þeirra sem koma að uppeldi barna og ungmenna. Bókin byggir á rannsóknum Sigrúnar á félags-og tilfinningaþroska nemenda og því byggð á fræðilegum grunni. Hún er mjög aðgengileg til lestrar og ætti að vera til á sem flestum heimilum.

Síðan var kjördæmisþing framsóknarmanna í Reykjavík haldið. Ég er félagi í Reykjavík suður og á sama tíma funduðu framsóknarmenn í Reykjavík norður. Í framhaldi voru síðan kjördæmissamböndin sameinuð í eitt og er það af hinu góða. Hef hins vegar verulegar áhyggjur af mætingu á fundinum. Eitthvað mikið að sem þarf að skoða.

Ég er síðan á leið á miðstjórnarfund Framsóknarflokksins síðar í dag. Hann er haldinn á Akureyri í þetta sinn. Ég hef setið í miðstjórn flokksins frá árinu 1991 eða í 16 ár og á þeim tíma hefur miðstjórnarfundur alltaf verið haldinn í Reykjavík. Kannski þetta boði breytingar á stefnu flokksins. Ég a.m.k. með opnum huga á þennan fund.

Að skrifa fyrir sjálfan sig eða aðra?

Fór í morgun á fjármálaráðstefnu sveitarfélaga sem haldinn er á Hilton Hóteli.

Hafði fengið leyfi til þess að sitja þar fyrirlestur um þjónustutilskipun Evrópusambandsins sem snýr að almannaþjónustu.  Góðir fyrirlesarar sem þar voru en verð að viðurkenna að þetta málefni er frekar tormelt. Kannski þess vegna sem ekki kom nema ein fyrirspurn úr sal, og hún var frá lögfræðingi innan stjórnsýslunnar.

Hef verið að velta fyrir mér að skrifa um þetta efni í lokaverkefni mínu í meistaranáminu. Vekur ekki sérstakan áhuga þeirra sem ég segi frá þessari hugmynd minni. Sérhæft og erfitt fyrir fólk að setja sig inn í þetta verkefni nema það sé mitt í hringiðu stjórnsýslu sveitarstjórnamála.

Langar hálft í hvoru að skrifa um eitthvað krassandi og áhugavert. Laun og launakjör kjörinna fulltrúa og tengsl þeirra við kjósendur er síðasta hugmyndin. Án efa mun meira spennandi og fengi meiri athygli.

En stundum verður maður að láta skynsemina ná yfirhöndinni.

Á endanum verður maður að fara með þessa reynslu út á vinnumarkaðinn og leita sér að starfi. Þá er það einfaldlega svo að stjórnmálaáhuginn og lýðræðisumræða skilar ekki mörgum atvinnutilboðum. Því miður.

Rétt ákvörðun

Tel að þetta sé það eina sem borgarráð gat gert til þess að reyna að koma málinu aftur á byrjunarreit. Nýr meirihluti þarf á því að halda að öðlast trúverðugleika meðal borgarbúa og því verða kjörnir fulltrúar að viðurkenna að þarna hafi mál ekki verið unnin með réttum hætti.

Það virðist líka liggja fyrir að minni hluthafar í Orkuveitu Reykjavíkur eru ekki sáttir við hvernig mál hafa verið unnin og því verður að skapa sátt innan stjórnar OR á ný þannig að menn geti haldið áfram sínum störfum þar.

Það er hinsvegar spurning hvaða áhrif þetta getur haft á REI og verkefni þess fyrirtækis. Held að það muni taka langan tíma að vinna upp orðstír þess fyrirtækis. Slíkt mun ekki gerast nema á löngum tíma.

Borgarráð samþykkir að hafna samruna REI og Geysis Green

Jafnréttið fær nýjan byr

Án efa á eftir að verða mikil umræða um þetta frumvarp og skiptar skoðanir á einstökum þáttum þess.

Sé að völd Jafnréttisstofu eru aukin til muna í þessu frumvarpi. Henni er veitt heimild til að kalla eftir hvers kyns gögnum frá einkafyrirtækjum, félagssamtökum og stofnunum ef grunur leikur á að hlutaðeigandi hafi brotið gegn lögum um jafna stöðu og jafnan rétt karla og kvenna. Jafnframt verði heimilt að beita sektum, sem nema 50 þúsund krónum á dag, ef gögn berast ekki innan þess tíma sem krafist er.

Annað sem vekur athygli mína er að lagt er til afnám samningsbundinnar skyldu til launaleyndar í samræmi við stefnuyfirlýsingu ríkisstjórnarinnar. 

Fyrirtæki með 25 eða fleiri starfsmenn er líka samkvæmt frumvarpinu að gera framkvæmdaáætlun þar sem fram kemur hvernig fyrirtæki hyggist framfylgja jafnréttisáætlun sinni.

Síðan er tillaga þess efnis að jafnréttisfulltrúar ráðuneytanna hafi sérþekkingu á jafnréttismálum þar sem ljóst þykir að styrkja þurfi stöðu þessara fulltrúa frá því sem nú er.

Allt tillögur sem munu fá mikla umræðu á þinginu á næstu vikum

Frumvarpi að nýjum jafnréttislögum dreift á Alþingi í dag

Ritstjórn starfs og siðareglna borgarstjórnar

Á fundi borgarráðs í gær var eftirfarandi tillaga lögð fram:

Lögð fram svohljóðandi tillaga borgarstjóra frá 24. þ.m.:
Lagt er til að skipuð verði ritstjórn starfs- og siðareglna fyrir borgarstjórn Reykjavíkur, sbr. samþykkt borgarstjórnar frá í júní sl. Allir flokkar sem sæti eiga í borgarstjórn tilnefni fulltrúa í hópinn og verði Guðmundur Steingrímsson, aðstoðarmaður borgarstjóra, formaður hans. Hópurinn hefji þegar störf og getur hann kallað til þá embættismenn og sérfræðinga Reykjavíkurborgar sem verkefnið krefst. Drög að siðareglunum verði kynnt stjórnkerfisnefnd, forsætisnefnd og borgarstjórnarflokkum áður en þær verði lagðar fyrir borgarráð og borgarstjórn.

Málinu var frestað en ég hlýt að vona að hún verði samþykkt á næsta fundi ráðsins.  

Ritstjórn fyrir þetta mikla verkefni er mikilvæg og tel ég að Guðmundur sé vel til þess falinn að stýra þessu verki. Nú er bara að vona að vinna við starfs-og siðareglur borgarstjórnar líti dagsins ljós sem fyrst.

Jákvæðar breytingar framundan

Fór í dag í með son minn í fyrstu heimsókn í frístundaklúbbinn sem hann ætlar að dvelja í, eftir að skóladegi lýkur í vetur. Þetta er nýtt úrræði fyrir fötluð ungmenni 10-16 ára og rekið í samstarfi ríkis og borgar. Ég hef beðið með óþreyju eftir að það hæfi starfsemi síðan í haust.

Ég sé fram á nýja tíma hjá mér á næstu vikum.

Sumrinu eyddum við sonur minn meira og minna saman fyrir utan 14 daga sem hann dvaldi í frábærum sumarbúðum í Reykjadal.

Allt frá því að skólinn hófst í haust hef ég sótt hann í skólann kl. 14.10 á hverjum virkum degi og við eytt því sem eftir er dagsins saman. Vinnudagurinn ekki verið langur hjá mér frá skólabyrjun.

Þótt það sé yndislegt að eiga góðan tíma með börnunum sínum er öllum hollt að eiga tíma fyrir sjálfan sig. Svo ekki sé talað um að eiga samskipti við fólk á svipuðum aldri.

Því sé ég fram á jákvæðar breytingar hjá okkur báðum á næstu dögum og held að okkur báðum hlakki til.

Ég mun nú eyða næstu vikum í að undirbúa meistararitgerð mína í stjórnsýslufræðunum sem ég ætla mér að klára á vori komandi.  Sonur minn mun án efa eignast nýja vini og félaga í þessum ágæta klúbbi. 

Fjarri heimahögum

Stödd í Nurnberg í Þýskalandi. Verið þar síðan um helgi. Ótrúleg uppbygging hefur þarna farið fram frá lokum síðari heimstyrjaldar.

Hef fræðst mikið um einkaleyfi og stöðu þeirra þar sem eiginmaður minn situr 30 ára afmælisfund EPI-European Patent Institute.

Hinsvegar fræðst mikið um uppgang Hitlers í síðari heimstyrjöld og áform hans um heimsyfirráð. Ótrúlegt að sjá það sem eftir stendur að höfuðstöðvum flokks hans í Nurnberg. Þar var m.a. gert ráð fyrir að 50 þúsund áhorfendur  gætu verið saman komnir innandyra. 

Auk þessa hef ég svarað ótal spurningum eins og endranær um hversu margir búi á Íslandi, hversu stórt landið sé, hver sé helsta atvinnugreinin og hvaða mál við tölum. Er eins og oft áður í hlutverki sendiherra landsins, líkt og allir þeir sem slíkar samkomur sækja.

 

 

Friður eða átök?

Nú hefur verið gefin hin opinbera lína sjálfstæðismanna í Reykjavík um sambandslitin. Nú skulu menn hætta að ræða um ósætti innan hópsins og sammælast um að Vilhjálmur hafi traust  hinna borgarfulltrúanna og allra annarra sjálfstæðismanna í borginni.

Svo slæmt virðist ástandið hafa verið orðið að ekki aðeins mætti formaðurinn flokksins á fund sjálfstæðismanna í Reykjavík heldur ritaði varaformaðurinn grein í morgunblaðið í dag um hverju væri um að kenna.

Það má sjálfstæðisflokkurinn eiga að á undanförnum árum hefur forystu flokksins tekist með ótrúlegum hætti að halda flest öllum ágreiningi innan flokks, utan fjölmiðla.

Meðan aðrir flokkar hafa oft á tíðum logað stafnana á milli í ágreiningi, nú síðast frjálslyndi flokkurinn, þá þekkist ekki meðal sjálfstæðismanna að bera mál sín á torg.

Ágreiningur skal leystur innanbúðar.

En nú er eins og eitthvað hafi gerst, menn eru ekki lengur til í að sitja undir þessum vinnubrögðum. Kannski ekki skrítið þar sem stjórnmálaflokkar eiga að vera vettvangur fólks til að ræða mál á lýðræðislegan hátt. Takast á og hafa ólíka sýn. Jafnvel innan sama flokks.

Kannski er sá tími kominn að lokið sé farið að opnast á pottinum og við hin fáum að sjá hvað kraumar undir.  

 

„Hætta að takast á við fortíðina“

Menntun er máttur, eða hvað?

Er undrandi á ályktun félaga minni í framsóknarfélagi Skagafjarðar sem samþykkt var í gær á félagsfundi. Hún segir að þeir alþingismenn sem eru annað hvort veikir eða í námi skuli kalla inn varamann í sinn stað.

Þingmaður flokksins í kjördæminu Magnús Stefánsson er í námi um þessar mundir og reyndar líka Birkir Jón Jónsson þingmaður Norðausturkjördæmis. Reyndar eru þeir báðir í MBA námi við Háskóla Íslands. Námið fer þannig fram að kennt er annan hvern föstudag og laugardag til þess að fólk geti stundað atvinnu meðfram náminu. Ætti ekki að tefja þá félaga mikið frá því að sinna störfum sínum á þingi.

Hef alltaf talið það kost fyrir kjörna fulltrúa að hafa þekkingu á ólíkum sviðum þjóðlífsins. MBA námið er m.a. ætlað að efla starfshæfni og er góður kostur fyrir alla þá sem í senn vilja efla þekkingu sína í viðskiptafræði og auka færni í stjórnun og rekstri. Ekki veitir af slíkri þekkingu í störfum þeim sem kjörnir fulltrúar taka sér fyrir hendur.

Þetta nám gerir þá félaga án efa betri og hæfari sem kjörna fulltrúa á þingi og gerir þeim jafnframt kleyft að sinna verkum sinnum betur.

Held að Skagfirðingar hefðu betur fagnað þessu framtaki í stað þess að tala með þessum hætti til sinna félaga.  Eða er þetta kannski allt byggt á misskilningi?