Koma jólasveinar í flugvél?

Sonur minn 10 ára er einstakur um margt, en þessa dagana er hann heltekinn af jólasveinunum. Hann hefur talið niður í komu þeirra og nú eru þeir farnir að koma einn af öðrum sveinarnir.

Hann sendir þeim bréf sem lesin eru af áfergju af sveinunum um óskir sínar og vonir um það sem verði í skónum. Á liðnum árum hefur hann stundum verið svolítið stúrin yfir því að óskirnar rætast ekki samstundis.

En nú fara mál að verða snúin fyrir jólasveininn og gjafir þær sem birtast í skónum. Pilturinn er á leið í ferðalag til eyjaálfu með foreldrum sínum og tvær nætur verður hann á flugi yfir lönd og haf.

Hann hefur margar spurningar vegna þessa sem ég reyni að svara eins og mér er frekast unnt en þarf ég að beita mínu ýtrasta ímyndunarafli til að svara þeim.

Hann vil gjarnan fá að vita hvar hann eigi að setja skóinn um borð í flugvélinni. Hann vil líka vita hvernig sveinarnir geti komið gjöfum til skila ef ekki megi opna gluggann í vélinni. Hann spyr mig hvort þeir skilji bréf á íslensku og hvernig þeir viti af ferðum sínum.

Nú er bara að vona að jólasveinarnir komi sínu til skila, sama hvað líður tíma og rúmi.

 

 

Athugasemdir

[Svanfríður Guðrún Gísladóttir, 17.12.2007 kl. 18:40]

Það er ekki að spyrja að honum ,,Vilmundi".Hann er fróðleiksfús eins og móðirin.Það getur orðið erfitt að leysa þetta mál svo vel fari.  Ég óska ykkur góðrar ferðar og Gleðilegra jóla.

Ég fékk ,,lungnabólgu í Köben og kom fárveik heim,fyrsti dagurinn á fótum var í gær. KV: Svanfríður