Krafa mín til kjörinna fulltrúa framsóknarflokksins

Við framsóknarmenn höfum lengi setið undir því að vera manna spilltastir í pólitík. Ég hef þó seint talið mig eða mikinn meirihluta framsóknarmanna falla þar undir.

Þó verður að viðurkennast að innan okkar raða leynast einstaklingar sem setja sinn eigin hag fram yfir heildarhag kjósenda flokksins eða íbúa þess svæðis sem þeir eru kjörnir fyrir.

Ég trúði því lengi frameftir síðasta áratug síðustu aldar að yngra fólk sem myndi taka við forystutaumunum í flokknum myndi starfa á breytum forsendum og  beiti vinnubrögðum sem kæmu í veg fyrir þessa umræðu. 

Nýtt fólk myndi þannig breyta þeirri ímynd sem flokkurinn sat upp með, með réttu eða röngu. Nýir tímar sem kölluðu  á opna og gegnsæja stjórnsýslu myndu færa umræðuna frá þeirri meintu spillingu sem átti þannig að viðgangast innan flokksins. Menn myndu viðhafa góð vinnubrögð sem kjörnir fulltrúar flokksins.

En slíkt er því miður ekki raunin. Nú er eitt málið enn komið upp þar sem fulltrúi flokksins í borgarstjórn er sakaður um að hafa ekki farið að lögum. Þótt sekt sé ekki sönnuð tel ég engan vafa á að þarna hafa menn farið langt fram úr öllum eðlilegum vinnubrögðum. Ekki síður þykir mér það vafasamt, ef satt er, að stjórn þess nýja félags sem nú hefur verið skipuð skammti sér 350 þúsund króna mánaðarlaun. Og þarna sitja menn sem kjörnir fulltrúar almennings og fara með almennafé.

Mín krafa til kjörinna fulltrúa framsóknarflokksins er að menn vinni eftir þeim lögum og reglum sem liggja að baki góðri stjórnsýslu. Það á sérstaklega við fulltrúa flokksins í borgarstjórn sem nú virðist ætlast að takast að opna enn og aftur á þá umræðu sem tengd hefur verið við framsóknarflokkinn og spillt vinnubrögð.

Ef takast á að koma framsóknarflokknum upp úr þeim djúpa dal sem hann liggur nú í verða menn að taka heildina fram fyrir sinn eigin hag. Þar er enginn undanskilinn.

Athugasemdir

[Valgerður Halldórsdóttir, 5.10.2007 kl. 11:36]

Já mikið er ég sammála þér í þetta sinn!

[Sigurður Sigurðsson, 5.10.2007 kl. 12:54]

http://siggisig.blog.is/blog/siggisig/entry/328910/

[Andrés.si, 6.10.2007 kl. 01:40]

Anna. Samt ertu framsoknakona. Aðrir stimpluðu þíg held ég.

[Bjarni Harðarson, 6.10.2007 kl. 02:01]

ég er mikið sammála þér anna - og það eru allir þeir framsóknarmenn sem ég hefi talað við.

[Sveinn Hjörtur , 6.10.2007 kl. 21:22]

...heyr...heyr!

[Ólafur Sveinn Haraldsson (IP-tala skráð) 7.10.2007 kl. 00:14]

Nákvæmlega það sem ég hef verið að hugsa. Bara vonandi að fólk gleymi ekki hvernig sumir menn eru inn við beinið.

 mbk.

[Guðbjörg Elín Heiðarsdóttir (IP-tala skráð) 7.10.2007 kl. 10:13]

Ég tek undir með Bjarna Harðarsyni. Ég skil ekki hvernig þessir menn  komast upp með svona vinnubrögð. Tökum höndum saman í framsóknarflokknum og burt með spillinguna.

[Björk Vilhelmsdóttir, 7.10.2007 kl. 23:25]

Styð heilshugar félagshyggjuöflin í Framsókn sem vinna gegn spillingu og gamaldags vinnubrögðum í pólitíki.

[Jóhann Páll Símonarson, 8.10.2007 kl. 11:19]

Heil og sæl Anna.

Ég tek undir þín orð og voru orðinn sem Framsóknarflokkurinn ætlaði að bæta til að auka fylgið sitt. Viti menn Björn Ingi Hrafnsson hefur farið offari með sinni frekju gagnvart félögum sínum í flokknum. Ekki nóg með það hann hefur ráðið vin sinn Óskar Bergsson í fullt starf hjá Reykjavíkurborg. Þessi vinnubrögð eru með ólíkindum.

Jóhann Páll Símonarson.