Hver er verri meiri eða minnihluti?

Fannst hún sérkennileg þessi frétt sem ég sá inni á eyjunni í fyrradag.

"Bæjarstjórn Kópavogs samþykkti einróma á fundi í kvöld tillögu Gunnars I. Birgissonar, bæjarstjóra, um að óska eftir áliti bæjarlögmanns á því hvort fulltrúi Samfylkingarinnar í skólanefnd bæjarins hefði verið vanhæfur í skilningi stjórnsýslulaga þegar hann tók þátt í að fjalla um og greiða atkvæði með frænda sínum í stöðu aðstoðarskólastjóra við Smáraskóla fyrr í sumar."

Jafnframt var sagt í fréttinni frá því að minnihluti í bæjarstjórn hefði á sama hátt haft efasemdir um hæfi fulltrúa meirihluta fyrr á þessu ári.

Nú er það þannig að hverju sveitarfélagi á að vera það kappsmál að þar sé viðhöfð  góð stjórnsýsla. Þar eiga starfsmenn sveitarfélagsins að vera leiðbeinandi fyrir þá sveitarstjórnarmenn sem þar starfa. Kjörna fulltrúa og nefndarmenn.

Reykjavíkurborg heldur þannig námskeið fyrir nýja sveitarstjórnarmenn eftir hverjar kosningar til þess að fara yfir lög og reglur sem gilda um slík störf.

Ég man ekki betur en mér hafi verið sérstaklega úthlutað riti um fundarsköp og vinnureglur þegar ég tók sæti fyrst í nefnd á vegum Reykjavíkurborgar árið 1998. Þar var m.a. rætt um mögulegt vanhæfni nefndarmanna.

Jafnframt fagnaði ég því hér í pistli þegar samþykkt var samhljóða tillaga um að móta siðareglur fyrir borgarfulltrúa og bíð en eftir að slíkar reglur líti dagsins ljós.

Held að kópavogsbær og önnur sveitarfélög ættu að setja sér slíkar reglur. Jafnhliða ættu meiri-og minnihlutar í sveitarfélögum að sjá metnað sinn í því að móta góða og skilvirka stjórnsýslu.

Það ætti að skila betri árangri fyrir alla í stað þess að standa í deilum um hvort fulltrúar meiri-eða minnihluta kópavogs sýni verri frammistöðu í störfum sínum í sveitarfélaginu.