Framtíðarsýn unga fólksins?

Hef áhyggjur af öllu því unga fólki sem hefur verið að kaupa sínar íbúðir að undanförnu. Unga fólkið okkar sem hefur talið að krepputal sé aðeins eitthvað sem aðeins er til í hugum miðalda fólk. Þetta sama fólk sem óhrætt tók lán upp að 100% af verði fasteignarinnar.

Hvað gerist ef spá Seðlabankans rætist?

Hversu mikið af þessu unga fólki stendur þá árið 2010 uppi með óseljanlegar eignir og skuldar bankanum meira en það getur nokkuð tíman selt eignina fyrir.

Hrina gjaldþrota mun þá eiga sér stað meðal unga fólksins og án efa mun þetta sama unga fólk velja það að hverfa úr landi og leita tækifæra annars staðar.

Er þetta sú framtíðarsýn sem íslensk stjórnvöld vilja bjóða unga fólkinu okkar upp á? Það þarf aðgerðir strax.

 

Alvarleg staða efnahagsmála

Skilur almenningur skipulagsmál?

Ég sé í pistli Oddnýjar Sturludóttur á eyjunni í dag að á hugmyndasmiðju miðborgar, sem haldinn var á vegum samfylkingarinnar í gær, hafi komið fram tillaga um að stofna embætti umboðsmanns borgara í skipulagsmálum.

Ég held að þetta geti verið ágæt tillaga og full þörf á að hjálpa fólkinu í borginni að skilja skipulagsmálin betur. Kannski ekki endilega að stofna embætti umboðsmann en að minnsta kosti gera almenning kleyft að leita sér frekari aðstoðar í skipulagsmálum.

Þótt að á skipulags og byggingarsviði borgarinnar vinni fjöldi sérfræðinga í málaflokknum er álagið mikið á starfsmenn og erfitt að veita almenningi tímafreka þjónustu og jafnframt leiðbeina einstaklingum með ítarlegum hætti í skipulagsmálum.

Sem dæmi um þann fjölda mála sem kemur inn á borð embættismanna á skipulagsviði voru afgreidd 4.500 mál á árinu 2007 á afgreiðslufundum byggingarfulltrúa, 1.950 mál afgreidd á fundum skipulagsfulltrúa og 1.365 mál lögð fram á fundum skipulagsráðs. Þetta er ótrúlegur fjöldi ekki síst þegar starfsmenn sviðsins eru 45.

Það eru tæp tvö ár síðan ég sat sem varaformaður skipulagsráðs Reykjavíkurborgar. Þá voru ófá símtölin sem ég fékk frá fólki í borginni þar sem óskað var eftir leiðbeiningum um hvernig menn ættu að snúa sér vegna skipulagsmála. Hvort sem var vegna einfaldra breytinga á íbúðarhúsnæði eða nýbygginga.

Þótt mér finnist ár og dagur síðan ég sat minn síðasta fund í skipulagsnefndinni eru menn ennþá að biðja mig um leiðbeiningar. Sá síðasti sem það gerði, hringdi í mig í gær.

Það að kæra framkvæmd nágranna fyrir úrskurðarnefnd er ekki einföld, breytingar á deiliskipulagi eða aðalskipulagi hljómar eins og latína í eyrum þeirra sem ekki þekkja.

Það er ekkert einfalt við það reglugerðarfargan sem liggur að baki ákvörðunum í skipulagsmálum.

Á heimsíðu skipulagsviðs koma fram tilvísanir; í skipulags- og byggingarlög nr. 73/1997. í skipulagsreglugerð nr.400/1998, reglugerð um breytingu á skipulagsreglugerð nr.400/1998 og hér er svo reglugerð um breytingu á skipulagsreglugerð nr. 400/1998, með síðari breytingum.Hér er tilvísun í Byggingarreglugerð nr. 441/1998. Hér eru svo breytingar á byggingarreglugerð:563/2000 - Reglugerð um breytingu á byggingarreglugerð nr. 441/1998.,996/2001 - Reglugerð um breytingu á byggingarreglugerð nr. 441/1998. 133/2002 - Reglugerð um breytingu á byggingarreglugerð nr. 441/1998, með síðari breytingum.425/2002 - Reglugerð um breytingu á byggingarreglugerð nr. 441/1998, með síðari breytingum. reglugerð um skipulagsgjald nr. 737/19,gjaldskrá fyrir bílastæðagjöld einnig eldri reglur um bílastæði -hluti þeirra er enn í gildi. Hér er tafla með bílastæðagjaldinu uppreiknuðu í samræmi við vísitölu,  reglugerð um eignaskiptayfirlýsingar, útreikning hlutfallstalna o.fl. í fjöleignarhúsum. nr. 910/2000.lög um fjöleignarhús. nr. 26/1994. lög um tekjustofna sveitarfélaga. nr.4/1995.reglugerð um fasteignaskatt )nr. 945/2000, öðlaðist gildi 1. janúar 2006. Öll lög og reglugerðir varðandi Fasteignamat ríkisins .Upplýsingar um Staðardagskrá 21 og lögreglusamþykkt fyrir Reykjavíkurborg.

Ég held að þessi tillaga sé af hinu góða, fæstir íbúar borgarinnar skilja skipulagmálin til hlítar. A.m.k. það flókna ferli sem hefst þegar menn ætla að að breyta eða byggja húsnæði.

 

Ólafur segir.....

Ólafur F. Magnússon borgarstjóri Reykvíkinga sagði í kvöldfréttum á RÚV að 10-16 ára fötluð börn fái að stunda frístundastarf á vegum borgarinnar í sumar.

Ólafur F. sagðist muni þrýsta á það við félagsmálaráðuneytið og samband sveitarfélaga að þetta nái fram að ganga og þessum hópum verði tryggð þessi þjónusta í sumar. Hann mun ekki gefa neitt eftir með það.

Ólafur F. sagði að það kæmi aldrei til greina að hann léti það spyrjast um sig, að hann ætli að úthýsa þessum börnum.

Svo mörg voru þau orð. Ég veit að Ólafur F. Magnússon mun tryggja þessum börnum úrræði í sumar. Hann sem borgarstjóri okkar Reykvíkinga hefur völd og úrræði til þess að tryggja slíkt.

Ég treysti því að orð Ólafs standi. Barnið mitt ásamt hinum fötluðu börnunum í borginni fá  þjónustu í sumar. Ég fer áhyggjulaus að sofa í kvöld.

  

Viðræður eru ekki lausn

Ég veit varla hvað ég á að halda eftir síðustu yfirlýsingu Reykjavíkurborgar vegna reksturs frístundaklúbba fatlaðra barna nú í sumar. Kannski ég hafi fagnað of snemma í síðustu færslu minni.

Á vef Vísirs kom fram nú í kvöld fréttatilkynning frá Reykjavíkurborg þar sem meðal annars segir að"af þeirri 56 millj. kr. aukafjárveitingu sem ÍTR fær til reksturs heilsárs frístundaheimila renna 31,7 millj. kr. til stuðnings barna með sérþarfir".  Gott og vel og vel í lagt fyrir þann hóp en Það breytir litlu fyrir þjónustu fyrir fötluð börn 10-16 ára í frístundaklúbbum borgarinnar. Eða þeirra fjölskyldur

Síðar í fréttatilkynningunni kemur fram að "Borgarstjóri mun á næsta fundi borgarráðs leggja fram tillögu um að teknar verði upp viðræður um frekari þróun þjónustunnar sem tryggi fötluðum börnum 10 til 16 ára dvöl í Frístundaklúbbum yfir sumartímann."

Viðræður, hvað skyldi það þýða og við hverja? Við ríkið kannski, um kostnaðarskiptingu við þjónustuna.

Slíkar viðræður taka a.m.k. nokkra mánuði ef ekki ár. Ekki síst þar sem undirbúningur um flutning málefna fatlaðra frá ríki til sveitarfélaga stendur nú yfir og menn semja varla um aukna þjónustu á meðan.

Verð að viðurkenna að ég horfi ekki bjartsýn fram á sumarið ef Ólafur F. ætlar að eyða því í viðræður um hver á að borga hvað, í þjónustu við fötluðu börnin í borginni.

Á meðan verða fjölskyldur fatlaðra barna í borginni án tómstundaúrræða fyrir börnin sín í sumar.

 

ÍTR leysir vandann

Vegna færslu minnar frá því  í morgun og frétta um niðurskurð á þjónustu við fötluð börn í sumar er ánægjulegt frá því að segja að málið virðist vera að leysast.

Þökk sé frábæru fólki hjá íþrótta og tómstundasviði Reykjavíkurborgar.

 Þessi frétt er nú inn á vef DV :

Yfirmenn Íþrótta- og tómstundaráðs, ÍTR, eru staðráðnir í að bjóða upp á frístundaklúbba fyrir fatlaða í sumar þrátt fyrir að borgarráð hafnaði fjárveitingu þess efnis. Þeir hugleiða nú með hvaða hætti bregðast skuli við niðurskurði borgarráðs.

Vonir stóðu til um að reka klúbbana á heilsársgrundvelli, líkt og frístundaheimilin verða framvegis rekin, en þess í stað samþykkti borgarráð ekki fjármuni til fatlaðra. Til greina kemur hins vegar að taka þá fjarmuni sem til þarf af öðrum rekstrarliðum ÍTR og þannig fái fatlaðir þá þjónustu sem þeir þurfa hjá ÍTR, óháð niðurskurðinum frá borgarráði.

Frábært fólk sem þarna starfar og ekki var við öðru að búast af þeirra hálfu en að gengið yrði í málið og það leyst  fljótt og vel.

Takk fyrir það.

Ólafur, hvar eiga fötluðu börnin að vera í sumar?

Sumarfrí nálgast í grunnskólum borgarinnar og hefur hefur það hingað til verið nokkurt púsl fyrir mína fjölskyldu líkt og aðrar fjölskyldur með börn.  Að vera með fatlað barn gerir málið en flóknara.

11. ára drengurinn okkar hefur hingað til ekki haft sömu möguleika til sumarstarfs og önnur börn og hefur því þurft að vera heima meira en minna allt sumarið. Það þýðir að einhver fullorðin hefur þurft að vera heima við á sama tíma.

Hann hefur  tvær vikur á sumri verið í frábærri sumardvöl í Reykjadal en annað sumarstarf hefur hann ekki getað nýtt sé undanfarin sumur. Hann er komin á þann aldur að sumarstarfið sem boðið er upp á kallar á sjálfstæði einstaklingisins sem hann ekki býr yfir.

Fyrir nokkrum dögum barst mér hinsvegar bréf frá frístundaklúbbnum, sem hann dvelur eftir skóla virka daga, þar sem fram koma að sumarstarfið þar yrði líklega frá 9.júní -21.ágúst frá 08.00-17.00 og hvaða vikur ég myndi nýta.

Við vorum því farin að skipuleggja sumarið með það fyrir augum að þetta sumarið gætum við verið nokkuð áhyggjulaus og stundað okkar starf án verulegrar skipulagningar.

Mér var því það nokkuð áhyggjuefni þegar í morgun var lesið upp úr forystugreinum dagblaðana, ritstjórnarpistil DV. Pistilinn fjallaði um það að borgarráð hefði skorið niður þessa þjónustu á fundi sínum s.l. fimmtudag. Ekkert fjármagn hafi verið veitt til starfsins í sumar.

Á vef DV kemur  fram:Frístundaheimili Reykjavíkurborgar bjóða framvegis upp á þjónustu á heilsársgrundvelli. Breytingin tekur gildi í vor og var samþykkt á fundi borgarráðs fyrir helgi. Íþrótta- og tómstundaráð borgarinnar óskaði eftir 75 milljóna króna fjárveitingu til að færa rekstur frístundaheimilanna og frístundaklúbba fatlaðra í heilsársform. Borgarráð samþykkti aðeins 56 milljónir króna og hafnaði beiðni um fjármagn til að halda úti sumarstarfi í frístundaklúbbum fatlaðra.

Erfitt að sjá þetta í fundargerð borgarráðs þar sem vísað er til umsagnar fjármálastjóra Reykjavíkurborgar sem ekki kemur fram í fundargerð. Am.k. tók ég ekki eftir neinu þegar ég las fundargerðina sl. fimmtudag.

Lagt fram bréf framkvæmdastjóra íþrótta- og tómstundasviðs frá 12. f.m., sbr. samþykkt íþrótta- og tómstundaráðs 8. febrúar sl., þar sem lagt er til að frístundaheimili ÍTR verði rekin á heilsársgrunni frá og með vorinu 2008, og óskað eftir fjárveitingu til verkefnisins. Jafnframt lögð fram umsögn fjármálastjóra, ódags.
Samþykkt með þeim hætti sem fram kemur í umsögn fjármálastjóra. Fjárveiting, 56 mkr., fari af liðnum ófyrirséð. R08020135
 

Þetta skapar ófremdarástand hjá mörgum fjölskyldum fatlaðra barna í borginni, ef rétt er.

Ég trúi því ekki fyrr en ég sé það svart á hvítu , að þetta sé stefna Reykjavíkurborgar í málum fatlaðra barna. Fötluð börn verða að hafa möguleika á að nýta sér tómstundarúrræði á sama hátt og ófötluð börn yfir sumartímann.

Ég skora á borgaryfirvöld að breyta þessari ákvörðun sinni til þess að þessi börn geti notið sömu þjónustu og önnur börn í borginni.

Þau þurfa á slíkri þjónustu að halda ekki síður en önnur börn í borginni og fjölskyldur þeirra eiga að geta stundað vinnu yfir sumartímann líkt og aðrar fjölskyldur í borginni.

 

Morgunútvarpið-aftur og nýbúin

Í morgun stillti ég útvarpið aftur á rás 1. Hef frá því morgunvaktin hætti í byrjun mars s.l. átt í erfiðleikum að finna mína réttu rás til að byrja daginn með. Ekkert af þeim mörgu útvarpsrásum sem í boði eru hafa verið við mitt hæfi.

Gafst upp í morgun og stillti aftur á rás 1. Íhaldsseminni eru engin takmörk sett.

Mér til mikillar undrunar hafði dagskránni verið breytt aftur. Nú hefst morgunútvarpið kl. 6.05 alla virka morgna í stað 7.30 áður.

Fagna þessu þótt mér hafi þótt dagskráin í morgun frekar rýr af talmáli en framtakið er þó gott.

Nú er bara að vona að þessi breyting dugi lengur en einn mánuð hjá RÚV eins og sú síðasta.

Hver verður nýr Vegamálastjóri?

Vegagerðin hefur átt hug minn allan síðustu vikur. Kannski ekki ein af þeim stofnunum ríkisins sem vekja mestan áhuga almennings og oftar en ekki neikvæð umfjöllun um störf hennar og forgangsröðun verkefna.

Ástæða þessa áhuga míns er tilkomin vegna þess að ég hef ásamt hóp ágætra kvenna verið að vinna verkefni sem tengist Vegagerð og ég fékk það hlutverk að taka viðtöl við nokkra starfsmenn stofnunarinnar.

Fann fljótt að það ríkir mikil starfsánægja hjá Vegagerðinni. Starfsaldur þeirra aðila sem ég ræddi við var hár og góður starfsandi virtist ríkja. Þetta átti a.m.k. við í miðlægri starfstöð vegagerðar.

Ég var orðin svo ánægð með þennan vinnustað á fimmta viðtalinu að það var farið að ræða um það í verkefnavinnunni hvort ég myndi ekki sækja um starf þarna í vor. Mér fannst það ekkert ólíklegt.

En hingað til hefur bara verið auglýst eftir starfskröftum með tækni og verkfræðimenntun hjá Vegagerðinni.

Og síðan var auðvitað auglýst laust starf Vegamálastjóra. Í þeirri auglýsingu kom fram að menntunarkröfur væru háskólamenntun í verkfræði eða sambærileg menntun . 

En hvað er sambærileg menntun við verkfræði? Það hlýtur að vera nokkuð teygjanlegt.

Á vef BHM kom þessi frétt:

Nokkrir félagsmenn aðildarfélaga BHM hafa vakið athygli bandalagsins á auglýsingu um stöðu Vegamálstjóra sem birtist á Starfatorgi þann 19. mars sl.Þar er gerð krafa um háskólamenntun í verkfræði eða sambærilega menntun. Alls óljóst er hvað átt er við með sambærilegri menntun; er átt við sambærilega lengd menntunar eða menntun í skyldum greinum og þá hverjum?Sé litið til verkefna stofnunarinnar eins og þau eru skilgreind í lögum í 5 gr. laga nr. 80/2007 felast þau helst í aðstoð við ráðherra vegna stefnumótunar, skiptingu fjármuna, rekstur og umsjón tilgreindra málaflokka. Á fjárlögum 2008 er gert ráð fyrir um 35 milljarða króna umsvifum Vegagerðarinnar og starfsmenn munu vera um 320.Í lögum um Vegagerðina er ekki gerð krafa um að Vegamálstjóri hafi verkfræðimenntun. Með vísan til þess, verkefna hennar og umsvifa fer Bandalag háskólamanna fram á að auglýsingin verði dregin til baka og staðan auglýst að nýju með skýrum kröfum um menntun umsækjenda.

Umsóknarfrestur um embættið rennur út á morgun, föstudaginn 4.apríl. Hef ekki mikla trú á að auglýsingin verði dregin til baka eða henni breytt úr því sem komið er.

Ætli auglýsingin sé kannski sniðin að þörf einhvers ákveðins umsækjenda eins og oft þekkist hjá hinu opinbera og búið sé að handsala embætti nýs Vegamálastjóra við einhvern gæðinginn.

Það verður fróðlegt að fylgjast með því hver verður ráðin í starf Vegamálastjóra og hvort viðkomandi verði ráðin utan eða innan stofnunar.

Skilaboð dagsins-mótmæli borga sig

Skyldu félögin hafa lækkað eldsneytisverð ef ekki hefðu komið til mótmæli? Held það varla.

Held að það séu skilaboð dagsins. Mótmæli borga sig.

 

Fleiri lækka eldsneytisverð

Leiðin greið?

Mikið hlýtur það að vera Samgöngumálaráðherra mikil léttir að borgarstjórn Reykjavíkur skuli vera búin að samþykkja hvaða leið skuli vera farið í lagningu sundabrautar.

Í gær var samþykkt í borgarstjórn áskorun þar sem fram kemur að að borgaryfirvöld hafi samþykkt samhljóða að sundabraut verði lögð í göng. Sú leið sé bæði út frá samgöngu- og umhverfissjónarmiðum langbesta lausnin til langrar framtíðar. Íbúasamtök Grafarvogs og Laugardals hafi einnig mælt eindregið með því að Sundagöng á leið 1 verði farin.

Jafnframt kemur fram í morgunblaðinu í dag að gerð Sundaganga eiga ekki að fylgja nein stórkostleg vandræði vegna jarðlaga á fyrirhugaðri gangaleið. Þetta telur Hreinn Haraldsson, framkvæmdastjóra þróunarsviðs Vegagerðarinnar, en sá ágæti maður er með doktorspróf í jarðfræði.

Um síðustu helgi  lýsti hinsvegar Ísleifur Jónsson, verkfræðingur og fyrrverandi stjórnandi Jarðborana ríkisins, að Jarðgangagerð væri varsöm leið fyrir Sundabraut. Hann nefndi þar hættu á jarðskjálftum og jafnframt að lekt í ungu bergi svæðisins verði mikil. Þessi skoðun hefði kannski getað tafið málið en gott að þeirri hindrun er rutt úr vegi.

Um langt árabil var það alltaf Reykjavíkurborg sem stóð í vegi fyrir því að hægt væri að hefja framkvæmdir við Sundabraut. Talsmenn ríkistjórnarflokkana töluðu alltaf í þá veru.

Að ekki væri búið að ákveða hvar leið ætti að fara. Ekki stæði á ríkisvaldinu að hefja framkvæmdir.

Nú liggur fyrir hvaða leið á að fara með lagningu sundabrautar og Samgönguráðherra hlýtur að setja málið í forgang og hefja undirbúning að framkvæmd strax.

Leiðin er greið og símapeningarnir bíða í bankanum. Ekki eftir neinu að bíða.

Sundabraut í framkvæmd strax.

Jarðfræði á leið Sundaganga vel þekkt