Leita í fréttum mbl.is

Bloggfærslur mánaðarins, júní 2008

Vestur og aftur suður

Komin aftur í borgina fyrr en ætlað var. Þurfti á fund sem ekki var hægt að fresta og því var keyrt suður í morgun. Svona er þetta stundum. Ekki hægt að láta bíða eftir sér.

Ferðin vestur var bara yndisleg og mér tókst næstum að gera allt sem ætlað var. Þó ekki alveg allt.  Sumt bíður betri tíma.

Ég fór í afmælið í Súðavík. Tvisvar sinnum með hóp af "boðflennum". Þar var öllum tekið opnum örmum og allir skemmtu sér vel.  Afmælið sjálft var engu líkt og afmælisbarninu til mikils sóma. Bæði jólasveinninn og Eiríkur Fjalar voru mættir auk annarra minni spámanna. Einlægnin í fyrirrúmi og borð svignuðu af veitingum. Dansað fram yfir miðnætti.

Farið tvisvar í Bolungarvík. Ósvör og Finnbogi heimsótt. Mjölnir og bræðurnir þar líka. Hlaðborð í garðinum á Hóli og síðan kjötsúpa í seinni heimsókninni. Farið í sundlaugina og nýja rennibrautin prófuð.

Sjóstangaveiðin varð ekki í þetta skiptið, því miður. Veðrið hamlaði. Heimsóknir í Dýrafjörðin í staðinn og kaffi á Hótelinu á Þingeyri. Ættingjar heimsótti á sunnudag. Hrefnukjötið klikkaði ekki frekar en fyrri daginn. Bestu þökk fyrir.

Eftir stendur líka frábær matur í Tjöruhúsinu. Sá frábæri veitingastaður var heimsóttur tvisvar. Kolinn, steiktur í smjöri er betri en nokkuð annað. Plokkfiskurinn og skötuselurinn lítið síðri. Rabbabaragrautur með rjóma í eftirrétt. Fær bestu einkunn okkar allra sem í ferðinni voru.

Eitthvað skorti hinsvegar á matagerðina í Edinborgarhúsinu. Kokkurinn var víst í fríi þegar sá staður var heimsóttur en það gleymdist að láta okkur vita af því.  Við hinsvegar létum vita af óánægju okkar með veitingarnar.

Á leiðinni suður sáum við Örn á flugi. Langt síðan ég hef séð þá sjón. Hlýtur að boða gott.

Hef að minnsta kosti þá trú eftir góða ferð vestur. Að allt fari nú á réttan veg.


Frá Reykjavík en samt að vestan

Nú skal haldið vestur á firði. Þaðan sem allt gott er komið. Eða svo var mér alltaf sagt.

Ég lærði það fljótt á minni ævi að ekkert alvöru fólk kemur frá Reykjavík. Þaðan er enginn ættaður. Allir eiga ættir sínar lengra að rekja.

Gaflarar verða til ef menn fæðast í Hafnarfirði en það sama virðist ekki vera um Reykvíkinga. Þeir koma víst allir frá öðrum stöðum. Sama þótt þeir hafi búið allt sitt líf í borginni.

Líklega leifar af þeim þankagangi Þegar menn töldu að allt slæmt kæmi frá kaupstöðum landsins. Í sveitinni væri allt betra og menningin blómlegri. Held varla að lífið sé svo einfalt. Allt hefur sína kosti og galla.

Ég kem að vestan í móðurætt. Frá Suðurlandinu í föðurætt. Hef þó hitt Þá fleiri í gegnum lífið sem vilja tala um vestfirska genið. Hef því frekar notað það, þegar ég kynni ættir mínar. Nema auðvitað að ég sé stödd á Suðurlandinu.

Nú skal haldið vestur. Í afmæli hjá góðum vin á Súðavík. Í kjötsúpu á Bolungarvík og sjóstöng á Suðureyri. Haldið til á Ísafirði.

Vinir og ættingjar heimsóttir. Kaffi og með því á öllum stöðum og  helstu fréttir fengnar.

Mikið hlakkar mig til. Fæ án efa orku frá galdramönnum fyrir vestan.


Lífið án frétta

Helgin leið án þess að ég hafi haft tíma til þess að skoða póstinn, lesa fréttir eða blogga. Vonandi til marks um að ég get lifað góða daga án þess að komast í tölvu.

Hef reyndar haft það oftar og oftar á tilfinningunni að undanförnu að ég sé illa haldinn af tölvufíkn. Eða kannski fréttafíkn. Ég þarf helst að heyra fréttir oft á dag og án þeirra finnst mér eitthvað vanta.

Síðustu mánuðir hér við tölvuna hafa haft þessar hliðarverkanir í för með sér.

Veit að þetta er ekki gott og var því fegin í morgun þegar ég áttaði mig á því að ég hafði ekkert farið í tölvuna síðan á föstudag eða lesið blöðin. Helgin var einfaldlega allt of annasöm fyrir slíkt.

Á laugardag var verið allan daginn í laugardalnum í góðum hópi. Notið dagsins og fylgst með úr fjarlægð glæsilegum sigri í kvennaboltanum. Dagurinn endaði síðan í Hafnarfirði þar sem hlustað var á afmælistónleika MND félagsins.

Á sunnudag Viðey heimsótt í góðum félagskap og frábæru veðri. Farið með yngsta soninn og nýjan félaga hans í bíó í lok dags og síðan í heimsókn til nýja félagans á Álftanesið. Dýrmætt að eignast vini Þegar félagsfærnin er ekki mikil og slíku tekið opnum örmum.

Í dag tekur síðan síðan við undirbúningur vegna vestfjarðarferðar sem byrjar á miðvikudag.

Kannski ágætt þegar gúrkan fer að ná yfirhöndinni í fréttaflutningi og sumarið sýnir sínar bestu hliðar.

 


Tímavél póstsins

Allt er í heiminum hverfullt. Svo er það líka með póstinn.

Í morgun kom bréfberinn með tilkynningu. Ég átti sendingu á pósthúsinu. Það gerist ekki oft. Ég varð pínulítið spennt. Kannski eitthvað óvænt.

Ég dreif mig á pósthúsið. Það var auðvitað ekki þar sem það var síðast. Hafði flutt frá síðustu heimsókn minni. Kannski ekki skrítið því langt var síðan.

Afhenti tilkynninguna. Kurteis afgreiðslustúlkan sagði mér að þessi sending kæmi ekki fyrr en á mánudag. Það stæði á tilkynningunni að hún kæmi NÆSTA virka dag. Þakkaði fyrir mig og sagðist koma seinna.

Skrítið hvernig þjónustan hjá póstinum er orðin. Þeir vita að ég fæ sendingu á mánudaginn. Áður en hún kemur. Þeir hljóta að búa yfir tækni sem ég ekki þekki.

Kannski einhverskonar tímavél sem segir þeim hvað gerist næsta virka dag. Spennandi. Og láta mig svo líka vita af því.

Bíð spennt fram á mánudag. Hvað skyldi þetta vera?


Þarf að segja meira?

Í tilefni dagsins: 

The informal slogan of the Decade of Women became

"Women do two-thirds of the world's work, receive 10 percent of the world's income and own 1 percent of the means of production."

- Richard H. Robbins, Global Problems and the Culture of Capitalism, (Allyn and Bacon, 1999), p. 354


Að halda trúverðuleikanum á milli kosninga

Núverandi meirihluti á Alþingi býr við þá góðu stöðu að hafa mikinn fjölda þingmanna á bak við sig. Af 63 þingmönnum styðja 43 ríkisstjórnina.

Það eitt gerir þessa ríkisstjórn sterkari en flestar þær sem á undan fóru. A.m.k. um langt árabil. Það gerir óbreyttum þingmönnum meirihlutans jafnframt færi á því að tala gegn samstarfsflokknum í einstökum málum. Slíkt er þannig umborið, ekki síst vegna stærðar meirihlutans.

Til lengri tíma litið halda flokkarnir þannig stöðu sinni gagnvart kjósendum. A.m.k. hafa einstaka þingmenn þannig talað fyrir stefnu flokksins í ákveðnum málum þótt flokkurinn hafi ekki getað "beitt" sér vegna afstöðu samstarfsflokksins.

Slíkt er gott fyrir stjórnmálaflokka. Hitt er verra þegar talsmenn flokkanna hætta að tala fyrir sínum stefnumálum á milli kosninga vegna þátttöku  í ríkisstjórn.

Það hafa dæmin sýnt okkur og ætti að vera öðrum flokkum víti til varnaðar. Samstarfið fer þá að skipta meira máli en stefnumál flokksins.

Sýnileiki á ólíka stefnu  flokkanna í meirihluta ætti þannig að skila flokkum meira fylgi í kosningum enn að flokkarnir tveir tali alltaf einum rómi.

Það er sá raunveruleiki sem við búum við. Raunveruleiki ríkisstjórnarsamstarfs með leyfilegum ágreiningi.  

 


mbl.is Harðari tónn í garð samstarfsflokksins
Tilkynna um óviðeigandi tengingu við frétt

Tvær veislur í sömu stofu

Útskriftin í gær var um margt merkileg. Hlýtur að vera í síðasta sinn sem útskrifað verður með þessum hætti frá HÍ.

Nú þegar Kennaraháskólinn og HÍ hafa verið sameinaðir hlýtur fjöldinn að verða of mikill til þess að hægt sé að útskrifa allan þennan hóp í einu lagi.

Í Laugardalshöll voru rúmlega þúsund útskrifaðir í einu. Þar af voru rúmlega 840 sem tóku á móti skírteinum sínum. Allt þetta tekur að sjálfsögðu mjög langan tíma.

Síðan tók við ræða Rektors og ég var auðvitað mjög stolt þegar nafn sonarins var nefnt ásamt nafni annars nemenda sem líka er heyrnaskertur og var að ljúka meistaraprófi.

Síðan tók veislan við. Hún skiptist í tvennt. Þeir sem töluðu talmál og þeir sem tala táknmál. Þessir tveir hópar blandast ekki saman nema að mjög takmörku leiti. Þannig er það líka í lífinu.

Ég fékk að segja nokkur orð í upphafi sem jafnhliða voru túlkuð á táknmál. Mín færni í táknmáli er því miður ekki svo mikil að ég geti flutt ræðu með því.  

Unga fólkið sat lengst eins og venjan er. Munurinn hinsvegar að engin hávaði fylgdi þessu unga fólki.

Þótt tónlist með sterkum bassa hafa verið spiluð í lokin var ekki hávaðanum fyrir að fara. Og síðan var haldið niður í bæ eftir miðnættið.

Góðum degi var lokið.


Dómurinn sem féll

Það var árið 1984. Ég tvítug með 2 ára tvíbura.

Fannst eitthvað vera að öðrum drengnum. Ákvað að láta athuga í honum heyrnina þvert á ráðleggingar fullorðna fólksins. "það er ekkert að þessum dreng, börn eru bara misjafnlega fljót að tala"var viðkvæðið sem ég fékk þegar ég velti fyrir mér af hverju annar drengjanna segði ekkert.

Ég fór samt. Lét ekki segja mér fyrir verkum. Tveggja daga rannsóknir tóku við. Síðan stóð ég inni hjá lækninum. Ein með annan drenginn.

Þá kom dómurinn. "Hann er mikið heyrnaskertur og verður að vera með heyrnartæki alla ævi. Veit ekki hvort hann mun nokkurn tímann tala".Mér fannst allt verða svart. Leið eins og mér hefði verið tilkynnt að barnið mitt gæti aldrei gengið. Dæmt til þess að vera minnimáttar.

Mér var ekki boðið sæti. Hvað þá áfallahjálp. Send fram á gang til að panta tíma fyrir tækjamátun. Þá brast ég í grát. Stúlkurnar í afgreiðslunni hugguðu mig.

Sonurinn fór fjögra ára í heyrnleysingjaskólann og var þar til grunnskóla lauk. Talaði táknmál. Eignaðist þar frábæra vini fyrir lífstíð. Flesta alveg heyrnarlausa.

Hann lærði smátt og smátt að tala. Var með"góðar leifar" eins og sagt var. Varð tvítyngdur. Lifði í tveim heimum.

Eftir heyrnleysingjaskólann fór sonurinn í MH. Það gekk illa. Hann fór úr 38 nemenda skóla þar sem kennt var á táknmáli, í 2000 manna framhaldsskóla, næstum án undirbúnings. Sjálfstraustið var ekkert. Var ekki bara best að fara að vinna. Hann myndi aldrei ná þessu.

Við sendum hann til Bandaríkjanna sem skiptinema með AFS. Þeir fundu fjölskyldu og  heimavistaskóla fyrir heyrnarlausa. Þar efldist hann og dafnaði. Hann gat þetta alveg.

Kom heim. Kláraði MH. Fór í Háskólann. Valdi Félagsráðgjöf. Veit sjálfur að það brennur margt á í samfélaginu. Ekki síst hjá minnihlutahópunum.

Á laugardaginn útskrifast hann sem félagsráðgjafi. Þar verð ég viðstödd. Drengurinn minn sem ég hélt 1984 að væri dæmdur til þess að vera minnimáttar.

Hefur sýnt og sannað að svo er ekki. Við getum allt sem við viljum.

Ég er ótrúlega stolt af honum. Eins og börnunum mínum öllum, sem sífellt koma mér á óvart.  

 

 


Rjúpan og svo fiskurinn

Þótt enn séu 196 dagar til jóla gefur þetta von. Kannski að nú verði aftur Íslensk rjúpa í jólamatinn.

30-70% aukning á austanverðu landinu bendir þó til þess að um staðbundna fjölgun sé að ræða en aldrei að vita nema slíkt gerist líka á suður og vesturlandi.

Nú er bara að krossleggja fingur og vona að það sama verði svo upp á teningum með fiskinn í sjónum við næstu talningu.

Þá geta menn farið að taka gleði sína á ný.


mbl.is Rjúpu fjölgar á ný
Tilkynna um óviðeigandi tengingu við frétt

Þrjú skref til baka aðferðin.

Setning þessa mánaðar er þrjú skref til baka. Allir eiga að taka þau, þ.a.s. í neyslunni. Við lifum á viðsjárverðum tímum.

Upplifði þetta í morgun þegar ég brá mér í Hagkaup í Garðabæ sem bauð upp á 40% afslátt af öllum vörum í dag og á morgun.

Hugsaði mér gott til glóðarinnar. Á von á fjölda gesta á laugardaginn í útskriftarveislu eins sonarins. Ætlað að kaupa sitt lítið að hverju til hátíðarhaldanna.

Sá strax að þetta var óðsmanns æði þegar að bílastæðunum kom. Hvergi hægt að leggja. Öll stæði upptekin.

Þegar inn var komið var auðvitað ekki hægt að fá neitt til þess að bera vörurnar í. Menn óku á undan sér yfirfullum vögnum af ýmsu góðgæti. Báru sumir vörurnar í yfirhöfnunum.

Kælarnir voru tómir af kjötvöru, flestir dýru vöruflokkarnir voru horfnir úr hillunum. Þó var nóg til enn í búðinni.

Náði síðasta flakinu af reyktum laxi. keypti eina góða ólífuolíu. Harðfisk. Nokkrar tegundir af servéttum og tekkolíu. Þá var fangið fullt.

Beið eftir því að komast á kassann í 45 mínútur. Maðurinn sem var á undan mér var með tvær sneisafullar kerrur af öllu mögulegu.

Hann greiddi 116 þúsund krónur fyrir sínar vörur. Hann hlýtur að eiga ótrúlega stóra fjölskyldu.

Ég borgaði 5 þúsund krónur fyrir vörur sem ég hefði kannski getað verið án.

Svona er þetta með þrjú skref til baka aðferðinni.

Allir að hamstra það sem við getum líkast til verið án. Af því það er með afslætti.

 


Næsta síða »

Höfundur

Anna Kristinsdóttir
Anna Kristinsdóttir
Stjórnmálafræðingur, MPA nemi og áhugamaður um samfélagsmál

Mitt val

Blogg Gáttin

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband